في السنوات الأخيرة، ولات الجرائم العائلية بزاف منتشرة، خاصةً اللي يكون سببها قرارات خاطئة من العائلات كيما تزويج الأولاد اللي عندهم اضطرابات نفسية ولا عقلية تحت شعار "يزوجوه يعقال". هاد الممارسات ماشي غير تدمر حياة الزوجة والأولاد، بل توصل حتى للجرائم الخطيرة اللي تخلع المجتمع كامل. في هاد المقال، رح نحكو على الأسباب الحقيقية لهاد الظاهرة ونقدمو حلول ممكنة باش نحدّو منها.

الأسباب الرئيسية لهاد الظاهرة :

1.     قلة الوعي بالصحة النفسية :

عندنا مشكلة كبيرة في المجتمع بلي بزاف ناس ما يعطوش أهمية للصحة النفسية، وكاين اللي يشوفو الاضطرابات النفسية حاجة عادية ولا مجرد "عيب". بزاف منهم يعتقدو بلي الزواج هو الحل السحري باش يتبدل الشخص.

2.     التستر على المشاكل من طرف العائلة :

كاين عائلات تخبي الحالة النفسية ولا العقلية للأولاد على الطرف الآخر خوفًا من "الفضيحة"، وهاد الشي يخلي الزوجة والأولاد اللي يجو بعدها يدفعو الثمن.

3.     غياب القوانين اللي تنظم هاد الأمور

رغم أنه الفحوصات الطبية إلزامية قبل الزواج، إلا أن الفحوصات النفسية مازالت ما تدخلتش كشرط، رغم أهميتها الكبيرة.

4.     الضغط الاجتماعي على العائلات

المجتمع ديما يضغط على العائلات باش يزوجو أولادهم بأي طريقة، وأي تأخر في الزواج ينظرولو كأنه مشكلة. هاد الضغط يدفع الأهل لقرارات عشوائية وغير مدروسة.

5.     التبرير المفرط للجرائم

كي تقع جريمة كيما القتل ولا العنف، ديما يكون التبرير الأول: "راه مريض نفسي"، ولا "راه مسحور". هاد الأعذار تزيد الطين بلة وتخلي الجرائم تولي متكررة.

 الحلول اللي لازم نخدمو عليها

 1.                 زيادة الوعي بالصحة النفسية :

لازم تكون حملات توعية كبيرة باش الناس تفهم أهمية الصحة النفسية، خاصة في العلاقات الزوجية.

نغيرو المفهوم الغلط بلي الزواج علاج للمشاكل النفسية.

 2.                إجبارية الفحص النفسي قبل الزواج

لازم نضيفو الفحص النفسي والعقلي كشرط أساسي قبل الزواج، كيفما الفحوصات الطبية.

هاد الخطوة تحمي الطرف الآخر من المشاكل اللي ممكن تصرا بعد الزواج.

3.                دور العائلة في مواجهة الحقيقة

العائلات لازم تكون واعية بالمشاكل النفسية لأولادها وما تخبيهاش، بل تبحث على العلاج.

بدل ما يزوجو الولد باش "يهربو من المشكلة"، لازم يداويوه ويهتمو به.

4.                حماية حقوق الزوجة والأولاد

لازم يكونو مراكز دعم نفسي واجتماعي للنساء اللي يوقعو في هاد الظروف.

تقوية القوانين اللي تحمي المرأة والأولاد من أي عنف نفسي ولا جسدي.

5.                التوقف عن تبرير الجرائم

ما لازمش كل مرة تقع جريمة نقولو "راه مريض نفسي" ونبرر له. لازم يتحمل الجاني مسؤولية أفعاله.

نشر ثقافة المحاسبة في المجتمع باش ما تكررش الجرائم.

وفي الأخير ..

ظاهرة "زوجوه يعقال" ماشي مجرد مشكلة صغيرة، بل أزمة كبيرة تأثر على المجتمع كامل. مسؤولية العائلة، القانون، والجمعيات المجتمعية هي مواجهة هاد الظاهرة والعمل على حلول جدية. الزواج ماشي تجربة ولا علاج للمشاكل النفسية، ولازم نواجهو الحقيقة باش نبنيو مجتمع مستقر وآمن للجميع.

 

بقلم : د سمية صالحي

استشاري علاقات زوجية، ومرشدة أسرية تربوية